О, великий Святителю и молитвинниче всея земли Приазовския и града Мариуполя основателю, отче наш Игнатие! Прими сие моление наше с любовию тебе приносимое. Ты бо имел еси попечение о еже спасати паству свою от погибели, и яко вторый Моисей извел еси люди греческия из рабства агарянского, из земли Крымская в землю сию. Изведи молитвами твоими, святителю Божий, и наши души из темницы, греховныя, да не погибнем люте со беззаконьми нашими. От юности Христа возлюбил еси, и тому Единому до скончания жизни твоея с любовию послужил еси, и явился еси яко отец чадолюбивый, полагали душу своя за други своя. Милостиво призри на нас, многогрешных, и молитвами твоими избави от соблазнов мира сего и козней диавольских. Величим бо и усты исповедуем, яко воистину ты являешися теплый за нас ходатай и заступник пред Господем во спасение нас грешных. Испроси нам от Господа, святыми твоими молитвами, вся яже на пользу душам и телесам нашим, дар коемуждо благопотребен, веру истинную, надежду твердую и любовь неоскудевающую, грехов наших истребление, мира умирение, от глада и пагубы избавление. Помози нам, святителю отче Игнатие, хранити веру православную в чистоте сердец наших и во исполнение заповедей Господних. Архиереем и пастырем нашим подаждь премудрость, чистоту и праведное житие, якоже и сам сими украшен был еси. Юным дождь воспитание благое, болящим здравие и скорбящим утешение, сущим в трудех помощь и укрепление, богатым смиренномудрие и ко ближним милосердие молитвами твоими даруй. Всех же нас укрепи иго Христово понести во благодушии, терпении и радости духовней, да сподобимся и мы с тобою вкупе наследниками Царствия Небесного быти и тамо со всеми святыми воспевати единого в Троице покланяемого Бога во веки веков. Аминь.